3 張相片
為推廣作為警隊成員的「榮譽‧使命‧忠誠」，內部調查課於去年舉辦了「我的警察故事」大賽，讓人員透過分享自己的警察故事，重溫作為警隊成員的光榮感，並喚起人員對日常警務工作隱藏價值的共鳴。
早前三期的《警聲》已刊登短文組獲得金、銀、銅及優異獎的十一篇作品，今期再節錄三篇獲得優異獎的短文。如欲細閱原文，請瀏覽警察內聯網的「誠信管理專欄」，或以下連結：（https://www.police.gov.hk/ppp_tc/11_useful_info/mypsc.html）。
優異獎作品：《小角色‧大意義之叮噹》
得獎者：水警北分區
警長「叮噹」當年投考警察面試時，考官問他最後一條問題：「點解你要做警察？」
叮噹：「我要食飯。」
考官只回答一句：「細佬，警察呢行飯唔係咁易食㗎。」
刻苦的訓練，令叮噹學識「好食，食多啲；唔好食，食飽啲」，佢開始發覺警察呢行飯真係唔易食。畢業後，叮噹駐守水警，但原來水警呢行飯又係唔易食。海面風高浪急，食飯好多時都係嘔返落個筒，白麵包通常係叮噹和同事們最好的伙伴，因為食完嘔少啲。雖然工作環境惡劣，但他們從無怨言，因為他們清楚自己係守護香港的第一道防線。
幾年後叮噹去了機動部隊和特遣隊駐守，那段時間示威行為漸趨激烈，每次緊守防線後都唔清楚幾時先再有飯食，彷彿食飯呢個動作喺叮噹生命中消失了；與家人和朋友的飯局經常要取消或遲到早退，甚至連婚宴也因為當晚有行動，結果有五圍同事未能出席。有時叮噹嫂都會抱怨每晚自己一個人食飯，警隊係咪無咗叮噹唔得。的確唔係無佢唔得，而係多一分力會更好。
隨着人生閱歷增加，叮噹更明白警察的職責係令市民可以好好享受食飯，但有兩件事令佢好痛心同食唔落飯。第一件事係2012年南丫海難，當晚叮噹全船人喺索罟灣做人流控制，目送最後一班人食完海鮮出海觀賞煙花之後，正預備叫外賣晚餐之際，災難就發生了。之後十多小時的救援工作見盡生離死別，令好多個家庭被摧毀，從此唔可以再坐埋一齊食飯。
第二件事係2018年叮噹在尖沙咀跳海拯救了一隻銀狐犬（小白），以為小白脫離險境後可以繼續享受食飯的權利，可惜幾日後被主人從高處掟下慘死。你們感受到叮噹當刻是何等心痛嗎？動物有生存及食飯的權利，點解要咁殘忍對待小白？之後七日，叮噹買咗七盒叉燒飯喺小白身故的後巷祭祀，希望小白感受到人間有愛。
食飯的深層意義大家懂嗎？
優異獎作品：《嬌嬸與杰仔》
得獎者：新界北總區快速應變部隊第二小隊
十年前，我剛被派往元朗軍裝巡邏小隊。
「一定又喺『嬌嬸』啦！」從拍檔東哥的語氣看來，似乎對這類求助見慣不怪。
東哥帶點無奈地說：「佢賣菜嘅，佢有個仔十幾歲，終日無所事事，群埋啲衰仔，成日返阿媽鋪頭偷錢。」
報案人正是他口中的嬌嬸，而他所提到的兒子，也正好在現場。他叫「杰仔」，當時只得十五歲，一把頭髮被染成金金黃黃，左手前臂有個黑色一團的紋身，他眼神虛浮，缺乏年輕人應有的朝氣。
東哥搭着杰仔的膊頭走過來說：「好啦嬌嬸！佢話今次只係想搵返自己啲嘢，唔會再隨便開妳個櫃啦！如果無其他嘢嘅，我叫佢走啦。」杰仔沒有理會我們，一臉不服氣的掉頭就走，我望着他那瘦小的背影消失於人群之中。
直到一個晚上，處理一宗「噪音投訴」事件時，我再見到杰仔。一個念頭突然湧現，我覺得可以做多一點。
「杰仔！」我叫住他：「咁夜重唔返屋企？」
「唔鍾意返咪唔返。」
「你依家先得十幾歲，將來大把路要走，無謂白白浪費時間呀！」我指指剛才他們坐過的地方，地上留下幾個啤酒空罐，說：「唔通想幾十歲仲係坐公園過夜？」
我說：「我知你以前過得唔開心，但係唔好俾過去嘅你，影響左將來嘅你，將來嘅路係要靠自己行出嚟嘅。」
他苦笑了一下，說：「阿Sir，你都幾長氣架喎！」
今天，我突然想起了嬌嬸的事，於是走到大棠路嬌嬸的菜檔。雖然年月在她臉上留下了風霜痕跡，但我認得她就是嬌嬸。
她隨手拿下牆上一張照片給我看，指着相片中的小男孩說：「呢個我個孫。」再指指旁邊一個男人說：「呢個我個仔。」
我問：「呢個……係杰仔？佢依家幾好嘛？」
「咪做水電囉！」她將相片小心翼翼地放回牆壁上，說：「喺屋邨商場有間細細水電鋪，做下街坊生意。」
「咁咪幾好。」我看到嬌嬸面上露出一種安慰的喜悅。
「咦！日頭唔好講人，一講佢就出現。」嬌嬸指指我身後說。
我轉過身，看見一男一女拖着一個男孩來到，這個男人比我十年前見到他時，明顯轉變了很多，身材健碩了，頭髮不是五顏六色，臉上多了一分神氣，添多了幾分男人的成熟。
「阿Sir，好耐無見喎！」杰仔先開聲，連聲音也厚重了。
他拉高了衫袖，露出一個跟十年前不同的紋身，笑笑說：「以前紋左乜就唔重要啦！」然後他拉低衫袖，說：「你講嘅，唔好俾以前嘅我，影響咗將來嘅我。」
如果當晚我沒有留下杰仔，沒有對他講了一番勸勉的說話，他會不會有另一個不同的將來呢？
優異獎作品：《拯救高危失蹤人士》
得獎者：柴灣分區軍裝巡邏小隊第三隊
2006年的一天，東九龍機動部隊協助尋找一名行山高危失蹤人士「陳伯」。正當我們趕到臨時指揮中心，卻收到飛行服務隊傳來的消息，在獅子山懸崖峭壁邊發現陳伯，但似乎沒有生命跡象。他的親人聽到噩耗情緒崩潰，相擁痛哭，令人心酸。
由於地勢險要，指揮中心決定暫停救援行動，但我腦海卻不停浮現陳伯太太痛哭及陳伯在荒野的情景。於是我大膽地提議上山，確認他的位置好讓支援隊伍跟進，沒想到一呼百應。
經過兩個多小時的艱辛路程，我們發現陳伯倒臥在接近懸崖的位置，五名同事奮勇地游繩而下，小心翼翼地爬到陳伯身邊。令人振奮的是他還有微弱的呼吸及脈搏，我們立刻把好消息傳達給家屬。
等待直升機救援的過程中，陳伯的呼吸越來越虛弱，無論我們怎麼呼叫，他都沒有反應。我突然想起，這一刻家人一定是陳伯最大的生存動力，才令他堅持了兩天，於是我拿出通訊機，讓陳伯的家人給他打氣。這時通訊機裏傳來哭聲：「阿爸，等你回家團聚呀，支持落去!」「阿爸！我同阿媽都好掛住你，你知唔知呀？我地好愛你！你一定無事架！」陳伯此時眼角震動一下，流出淚水，他聽到家人的呼喚！在場同事都感動得流下男兒淚。
經過二十分鐘的漫長等待，直升機落下吊床，陳伯順利登機。警察只要堅持做好本分，就能發光發亮，更能給別人帶來溫暖！
● 只有中文版
